Wasiirka Arrimaha Dibedda ee dalka Uganda, Sam Kutesa ayaa hadalkaasi ku sheegay mar  uu Suxufiyiinta kula hadlay Xarunta Warbaahinta oo uu ku faafiyey go’aanadii ka soo baxay Shirweynihii 28-aad ee Hoggaamiyayaasha Dowladaha Afrika dhawaan ku yeesheen Caasimadda dalka Ethiopia ee Addis Ababa. 

“Waxa aan doonayno ayaa ah in Qaaraanka Tabarucaadda asaas looga dhigo dib-u-eegis lagu sameeyo Ciiddanka dalalka xubnaha ka ah Hawlgalka Amisom.” ayuu yiri Wasiirka Arrimaha Dibadda ee dalka Uganda.

Dowladda Uganda waxay ciidamo u soo dirtay Somaliya sannadkii 2007-dii, kuwaasi oo haatan ah mid ka mid ah Ciiddanka Nabad-ilaalinta ee ugu tirada badan ee joogta Somaliya, kuwaasi oo tiradoodu dhan tahay 6,000 oo Askari.

Hawlgalkaasi waxaa maalgeliyay Midowga Europe iyo QM oo kharajka ku kala badan.

EU-da waxay dhawaan sheegeen qorshe ay dib ugu eegayaan Taageeradda ay siiyaan Taliska Amisom, iyo inay 20%  dhimi doonaan Mushaaraadka la siiyo Ciiddanka Hawlgalka Amisom.

Dhinaca kale, Wasiirka Arrimaha Dibedda ee dalka Uganda, Sam Kutesa waxa uu farta ku fiiqay inay weli socdaan Wada-xaajoodka ku aadan codsigaasi, iyadoo Siyaasad-Fuliyayaasha Afrika kulankooda ku soo qaadeen codsi hore oo ku aadan in dal kasta oo xubin ka ah Midowga Afrika ku tallaabsado Maalgelinta Hawlgalladda Midowga Afrika ee ay QM, EU-da ama Maraykanka inta badan qaadaan Mas’uuliyadda.