Burbur baaxad leh, ayaa ka muuqanaya dhismaha Hotel Peace ee Magaalada Muqdisho, ka dib markii shalay lagu weeraray gaari waldxaha qarxa laga soo buuxiyay.

Gaariga weerarka loo adeegsaday oo nooca xamuulka ahaa, ayaa ku qarxay laamiga uu saaran yahay hotelka, iyadoo dhismooyinka ku dhow dhowna uu burbur wayn soo gaarsiiyay.

Tiro meydad ah, ayaa laga soo saaray dhismooyinka burburay, sida ay soo sheegayan Suxufiyiinta ka hawlgala Magaalada Muqdisho.

Sababta hotelkan loo beegsaday, ayaa waxaa lagu macneeyay, iyadoo ay ku badan yihiin ajaaniibta, sidoo kalana ay degan yihiin xubno ka tirsan Dowladda Somaliya iyo shakhsiyaad xubno ka ah Guddiyada Doorashooyinka iyo Xalinta Khilaafaadka.

Al Shabaab, ayaa sheegatay masuuliyadda qaraxan iyo mid kaloo ka horeeyay, oo lala eegtay bar kontorool oo Ciidamada Dowladdu ku leeyihiin Isgoyska Danwadaagta ee Degmada Wadajir.